ភ្នំពេញ៖ អតីតមន្ត្រីព័ត៌មានរបស់គណបក្សភ្លើងទៀន គឺអ្នកស្រី ប៉ីប៉ី លី ក្រោយចូលរួមជីវភាពនយោបាយជាមួយគណបក្សប្រជាជនបានធ្វើការ Live វីដេអូហែកកេរ្តិ៍បក្សប្រឆាំងខ្ទេចពីភាពខ្សោយ និងការធ្វើបាបសកម្មជនរបស់ខ្លួន។

ប៉ីប៉ី លី លើកឡើងថា សកម្មជនបក្សប្រឆាំងជាច្រើនបានព្រាត់ប្រាស់គ្រួសារដោយសារការគាំទ្របក្សប្រឆាំង និងថាមនុស្សមួយចំនួនដែលរត់ភៀសខ្លួនទៅបរទេសត្រូវបាត់បង់អនាគតទាំងស្រុង។

អ្នកស្រីថា មនុស្សមួយចំនួនដែលធ្លាប់រិះគន់រដ្ឋាភិបាលពេលភៀសខ្លួនទៅក្រៅប្រទេសបែរជាឈប់រិះគន់វិញមិនមែនពួកគេទៅនៅបានសុខស្រួលទេតែពួកគេខ្មាស់ខ្លួនឯង។

អ្នកស្រីបានលើកឡើងថា អ្នកស្រីបានតស៊ូជាមួយនឹងបក្សប្រឆាំងជាច្រើនឆ្នាំមកហើយ ក៏ប៉ុន្តែលទ្ធផលគឺមិនដូចបំណងនោះទេ។ នៅក្នុងបក្សប្រឆាំងគឺមានខ្សែបក្សពួករាប់មិនអស់ ថែមទាំងមិនឲ្យតម្លៃអ្នកដែលធ្លាប់តស៊ូជាមួយគណបក្សនេះផងដែរ។

អ្នកស្រីថា៖ «អ្នកដែលដឹងដែលយល់ពីស្ថានភាពបក្សប្រឆាំងសព្វថ្ងៃគឺគេដឹងណាស់»។

គួរឲ្យដឹងផងដែរថា អ្នកស្រី ប៉ីប៉ី លី គឺជាមន្ត្រីព័ត៌មានបក្សភ្លើងទៀន និងជាអ្នកគាំទ្របក្សប្រឆាំងរដ្ឋាភិបាលច្រើនឆ្នាំមកហើយ កាលពីយប់ថ្ងៃទី៦ ខែឧសភា បានយំសោកដឹងកំហុសស្នើសុំចុះចូលគណបក្សប្រជាជន។

សម្ដេចតេជោបានសរសេរលើ Channel Telegram របស់សម្ដេចកាលពីយប់ថ្ងៃទី៦ ខែឧសភា ថា៖ «ក្នុងនាមគណបក្សប្រជាជនកម្ពុជាខ្ញុំសូមស្វាគមន៍ទទួលយកតាមសំណើររបស់

ប៉ីប៉ី លី និងស្វាមីដើម្បីចូលរួមជីវភាពនយោបាយជាមួយគណបក្សប្រជាជនកម្ពុជា»៕